Por agora les cafeteríes tarán presllaes, entantu s’espera poles nueves llicitaciones, que podríen quedar ermes

L’entamu’l cursu universitariu nun traxo consigo solución pal conflictu de les cafeteríes del Campus. Les llacerioses condiciones nes que quedaron les istalaciones tres del so aprofitamientu por Presedo desanimen a les empreses d’intentar algamar la concesión.

De magar ochobre del 2.016  una nueva empresa fízose cargu de la xestión de les dos cafeteríes del campus de Xixón. «El primer díi ya nos ficieron saber que la intención yera mandanos a toes a la cai», cuenten les emplegaes.

Les menacies, los despidos, los insultos, les falses acusaciones, la falta de mercancía y otres irregularidaes foron denunciaes poles trabayaores dende l’entamu y les protestes aportaron tamién d’estudiantes, profesores y clientes en xeneral.

Agora que la concesión queda abierta, el problema sigui ensin resolver: el so mal estáu fai que nun haiga nueva empresa que se faiga cargu de la xestión de les cafeteríes, siendo asina qu’estudiantes y profesores entamen el cursu ensin cafetería, que ye, como dicíen les trabayaores na concentración cellebrada’l miércoles pasáu desixendo una solución al tema “Un serviciu básicu pal furrulamientu del Campus, asina como pa la imaxen de la Universidá y l’Ayuntamientu de Xixón.”

This work is licensed under a Creative Commons Attribution 4.0 International License.