La reforma impuesta pol gobiernu español perpetuó’l retayu sistemáticu de facto de les pensiones, baxando’l so poder alquisitivu a un ritmu que, de nun camudar, fadría-yos perder un 10% de capacidá alquisitiva en cinco años
Les reivindicaciones que se lleven a esta marcha son abondes, entamando pola derogación de la reforma que’l Partíu Popular aprobó en 2013 y que significa un retayu siguíu de les pensiones y la medría d’estes acordies cola inflación, con implantación de midíes qu’aseguren el poder alquisitivu de los pensionistes y garanticen la viabilidá del sistema públicu, siguiendo cola meyora de los servicios de la Seguridá Social (amenorgamientu de les llistes d’espera, dentames y prótesis de baldre…), una Llei de Dependencia afayadiza a les necesidaes reales de curiaores y enfermos y sobremanera, les medríes salariales necesaries pa que dengún vieyu tenga de vivir perbaxo la llende de la probitú.
N’Asturies, viven más de 301.000 pensionistes, de los cuálos solo una mínima parte cobra la pensión másima, faciendo xubir la media fasta los 1.084 €, pero tando la gran mayoría alredor de los 600€ y siendo munchos los que cobren enforma menos. La media del SOVI (Seguru Obligatoriu de Vieyera ya Invalidez) ta ente 372 por xubilación y 388 la de vilbedá. La pensión d’ orfandá asitiase nos 453 € y la única qu’algama’l yá de por sí misérrimu Salariu mínimu interprofesional español (707€) ye la media de la pensión de vilbedá, con 718€.
Comparando estos datos cola xubida de los precios atopamos, nun país como Asturies, onde la población ta peligrosamente avieyada y munches families dependen de les pensiones de los sos mayores, con que los pensionistes perdieron dende’l 2.013 un 3,5% de poder alquisitivu. De siguir a esti ritmu, nel añu 2022 atoparíamos con que les pensiones perderíen alredor del 10% del so poder alquisitivu, daqué que va ser más acusao si tenemos en cuenta que les “grandes” pensiones de la minería y el sector naval van dir sumiendo, baxando la media a cifres más reales.
La marcha va salir de la Plaza Mayor de Xixón el 30 de Setiembre col enfotu de llegar a Madrid a pidir responsabilidaes el 9 d’ochobre. El colectivu de pensionistes asturianos movilizóse tamién esti añu por cuestiones qu’afeuten a tola sociedá, como l’accesu a la vivienda, contra la cláusula suelu y l’impuestu de socesiones, contra la violencia y los malos tratos a les persones mayores y a les muyeres…y alvierten que tienen pensao siguir.
Llucía F. Marqués
This work is licensed under a Creative Commons Attribution 4.0 International License.
