Alderique hestóricu nel hasta agora’l partíu más contrariu a los drechos llingüísticos

Destaca’l sofitu recibíu a la enmienda de Socialistes pola Oficialidá en Xixón, Samartín del Rei Aurelio y Llaviana. La enmienda foi aprobada con ampliu sofitu na asamblea de l’agrupación de Xixón, la mayor de la FSA, y por alcuerdu de consensu na de Samartín del Rei Aurelio, la tercer más numberosa del  partíu. Tamién foi aprobada en Llaviana, l’agrupación del nuevu secretariu xeneral de la FSA, Adrián Barbón, amás d’en Nava y Colunga.

A estos nuevos sofitos hai que sumar los de díes anteriores, como ye’l casu de les agrupaciones d’Uviéu, Llangréu, Siero, Llanera, L.lena, Sobrescobiu, Villaviciosa, Parres, Sariegu, Morcín, Ayer y Candamu, ensin escaecer la organización de mocedaes y la sectorial d’Educación de la FSA.

Esti sofitu masivu amuesa que la oficialidá xenera consensu nes bases de les agrupaciones de la FSA al marxe de les sos cúpules hestóriques, convirtiéndose nun ellementu d’alcuentru tresversal con independencia de les fracciones esistentes en rellación a la política estatal.

La enmienda va llegar la selmana viniente al Congresu autonómicu de la FSA.

This work is licensed under a Creative Commons Attribution 4.0 International License.