Boicó a los barcos unviaos pol Ministeriu d’Interior para agospiar a les FSE movíes a Cataluña

Los estibadores del Puertu de Barcelona y del Puertu de Tarragona decidieron el xueves nuna asamblea que nun van atender los buques llegaos a dambos puertos para agospiar a los axentes de les FSE españoles (Policía Nacional y Guardia Civil) treslladaos pol Gobiernu de Madrid a Cataluña pa reprimir los preparativos del referéndum del 1 d’ochobre.

Na so cuenta de Twitter, la Organización d’Estibadores Portuarios de Barcelona afirmaba que: “Aconceyaos n’asamblea, los estibadores de Barcelona decidimos en votación nun operar el buque Raphsody. En defensa de los drechos civiles”.

El Ministeriu del Interior tien fletaes trés embarcaciones de gran capacidá para atracar en dambos puertos catalanes: Rhapsody y Moby Dada en Barcelona y GNV Azzurra en Tarragona. En Barcelona yá hai dos cruceros, y en Tarragona hai un barcu.

This work is licensed under a Creative Commons Attribution 4.0 International License.