David Castañón – www.lesfartures.com – @lesfartures

El grandonismu asturianu piensa que Sidra namás faise n’Asturies, y que si nun ye asturiana nun ta bona. Pero sidra faise en casi tolos llaos del mundiu, anque nenguna ye a tomase de la mesma manera que la nuesa.

Sí que ye verdá que somos un referente mundial sidreru, por instalaciones, profesionalización, consumu y cultura, y que toos quieren algamar esi nivel na sociedá onde viven al rodiu la sidra. Mientres nós reburdiamos, otros nagüen polo que nós tenemos.

Mientres munchos restoranes asturianos nun saben lo que ye una botella sidra na so carta, o piensen qu’el mundiu namás acaba cola sidra natural, o s’avergoñen d’ella porque güel o ye bébora menor pa col vinu, equí vamos recibir esti fin de selmana llagareros de 15 paises y 4 continentes distintos, dende Xapón a Sudáfrica, pasando polos EEXX o de media Europa.

Llagareros de too’l mundiu que vienen a que-yos deamos el preste del so productu, pa ver si ta al altor de los cabezaleros nel mundiu de la sidra. Y eso ye un arguyu pa nós como país.

Una cena de gala, con tolos llagareros vestíos d’etiqueta, nun actu onde se premien la meyor sidra de cada clase, onde s’entemez l’asturianu con inglés, alemán, castellanu o xaponés. Meses amestaes, con xentes de distintes cultures compartiendo, aprendiendo, entrugando alrodiu la sidra. Xornada de Tastia Abierta pa que too’l mundiu pueda probar tola sidra, Xornada con Sumilleres d’estos países, Alcuentru de Periodistes y Bloggers … Un amiestu cultural al rodiu la sidra con Asturies como anfitriona.

¿Ye pa tar o non arguyosu del entamu de la Fundación Asturies XXI?

This work is licensed under a Creative Commons Attribution 4.0 International License.