El trunfu masivu del SI ta siendo acompañáu d’un bloquéu polos Estaos vecinos

Cola participación d’unos 3,3 millones de ciudadanos (un 72,16% del censu electoral del Kurdistan hasta agora integráu n’Iraq), los resultaos del otru referéndum polémicu de la pasada selmana foron los vinientes: un 92,73% a favor del SI, y un 7,27% col NON.

Darréu’l Parllamentu iraquí aprobó un paquete de dolce midíes destinaes a castigar la “rebeldía” de la población kurda, que por embargu ye independiente en términos militares dende qu’en 2014 l’exércitu iraquí abandonó’l so territoriu fuxendo del avance del Estáu Islámicu.

Nestos momentos los Estaos d’Iraq, Turquía ya Irán tan coordinándose pa aisllar y sabotear económicamente la constitución d’esti territoriu kurdu como un nuevu Estáu independiente. De fechu Iraq yá ta empecipiando maniobres militantes conxuntes con Irán y con Turquía pa controlar les antigües fronteres internacionales del Kurdistan ex-iraquí. Ente otres midíes de presión, Teherán prohibió’l tresporte de productos petrolíferos ente’l so territoriu estatal y esti fragmentu del Kurdistan (d’un volume de les transacciones añales qu’algama los 5.000 millones de dólares), Bagdad suspendió los vuelos internacionales colos dos aeropuertos de la fastera afectada pol referéndum (con gran dependencia de la inversión estranxera pal so desenvolvimientu), y Turquía unvía misiles a la frontera coles mesmes que sigui amenaciando con una intervención.

Per otru llau, la ONU y los Estaos Xuníos realizaron una ufierta de mediación ente Bagdad y Erbil.

This work is licensed under a Creative Commons Attribution 4.0 International License.