Coincidió nel mesmu espaciu con una concentración pola concordia

El sábadu pela mañana coincidieron dos concentraciones na plaza del Conceyu d’Uviéu. Una, convocada por la plataforma estatal Hablemos, creada oscuramente estos caberos díes. La otra, pola plataforma Asturies pol Derechu a Decidir, presentada públicamente nuna rueda de prensa en Xixón la selmana pasada.

La primera, reclamando’l diálogu y la concordia, pero ensin encetar la problemática del derechu d’autodetermín de los pueblos; la segunda col fin de realizar un exerciciu de pedagoxía política sobro l’exerciciu de la soberanía popular.

Hebo un momentu tirante nel qu’asistentes al eventu de Hablemos, que portaben banderes blanques, increparon a miembros de la plataforma asturiana por llevar banderes asturianes, coloraes y feministes, glayando “Sin banderas”. Pero acullá d’esta anécdota dambos actos foron cellebraos ensin mayor problema.

Asturies pol Derechu a Decidir realizó un referéndum simbólicu, nel cual participaron dos centenares de ciudadanos asturianos, nel que foron plantegaes quince entrugues sobro distintos aspeutos sociales, culturales, políticos o ecolóxicos de la vida coleutiva de la población asturiana.

This work is licensed under a Creative Commons Attribution 4.0 International License.