Esti fin de selmana entamaron los talleres d’ampliación curricular pa neños y neñes d’Altes Capacidaes entamaos pola Conseyería d’Educación a los qu’asistieron 45 de los alrodiu de 700 escolinos diagnosticaos n’Asturies
Rapacinos de tolos colexos de Xixón, pente los nueve y los trece años, asistieron a tres talleres especialmente diseñaos pa los sos intereses y forma de deprender, mui estremada a la de la mayoría de los escolinos colos que comparten educación a diario.
Namás 45 neños y neñes de los cerca de doscientos que lo solicitaron algamaron una plaza nesti nueu proyeutu col que se fai por atender a les necesidaes especifiques d’esti coleutivu.
Periodismu, química y xestión de les emociones foron los tres temes trataos nos talleres, que se desendolcaron en tres maratonianes sesiones de más de tres hores, pente’l vienres ya’l sábadu. Sicasí, a los asistentes abultóllos pocu: siguiríen a esi ritmu con ganes el resto la selmana. Lo que quieren – o meyor dicho, lo que necesiten- ye deprender, al so ritmu y nun ambiente que yos ufierte les ferramientes y les llibertaes que precisen pa desendolcar el so talentu, daqué imposible nel ríxidu y repetitivu sistema educativu actual.
Llucía F. Marqués
This work is licensed under a Creative Commons Attribution 4.0 International License.
