El prósimu 12 d’ochobre, nel Cimenteriu de Pando (Llangréu), au descansen los restos del presidente del Conseyu Soberanu, Belarmino Tomás, Andecha Astur cellebrará el tradicional homenaxe a la revolución asturiana d’ochobre del 34

La fecha del 12 d’ochobre ye esti añu la escoyía pa esti homenaxe, tanto por asitiase metanes del periodu revolucionariu asturianu, como pola sinificación que pa los españoles tien esa xornada, na que cellebren una “Hispanidá” nidiamente venceyada al conceutu más colonialista de lo que ye España.
La tumba de Belarmino Tomás ye’l llugar d’alcuentru añal pa celebrar estes feches, pol protagonismu qu’esti home tuvo n’Ochobre del 34, primero, y como presidente del Conseyu Soberanu, dempués, pero con elli quier representáse a tol pueblu asturianu, que tuvo’l valor de defendese frente al exércitu de la República Española, y que tuvo en Belarmino Tomás l’interllocutor que negoció énte esi exércitu republicanu español una rindición pautada, que llueu los españoles nun respetaríen, protagonizando una represión sangrina y xabaz.
Dende Andecha Astur ven naquellos fechos hestóricos un exemplu a siguir “frente al proyeutu d’esfarrapamientu, esaniciu, paru, precariedá, emigración forciada de la mocedá y asimilación colonialista que l’Estáu español tien entamáu p’Asturies.”

Tamién comparen esti momentu hestóricu, nel que’l Pueblu Asturianu, declaró la República Obrera y Campesina d’Asturies frente a la República Española, “qu’incapaz de respetar el Drechu a Decidir del Pueblu Asturianu procedió a invadir militarmente’l nuesu país”, cola situación vivida anguañu en Cataluña, onde la voluntá del Pueblu Catalán de decidir llibremente’l so futuru vese menaciada por esi mesmu Estáu español.
L’homenaxe tendrá llugar a la una la tardi nel cimenteriu de Pando (Llangréu) del xueves doce d’ochobre.

Redaición InfoAsturies

This work is licensed under a Creative Commons Attribution 4.0 International License.