El tradicional homenaxe nel qu’Andecha Astur honra al Pueblu Asturianu, qu’hai ochenta años declarare la República Obrera y Campesina d’Asturies frente a la República Española, coincidió esti añu cola cellebración n’España del díi de la Hispanidá “una xornada d’esaltación del so patrioterismu colonialista.”

L’homenaxe a los héroes de la revolución asturiana, que tuvo llugar nel cimenteriu de Pando, cientróse  nun sentíu actu nel que la oradora, tres de remembrar el valor del pueblu asturianu al enfrentase al estáu español, se dirixó direutamente a Belarmino Tomás, poniéndolu al díi de los caberos acontecimientos y faciendo una comparanza pente la hestoria asturiana y la situación que se ta viviendo en Cataluña, con avisu a los catalanes pa que tean sollertes en casu d’aportar a tratos, ya que la esperiencia asturiana  fai dudar de la bona fe del estáu a la hora de cumplilos.

En cuantes a l’actualidá asturiana, repasó rápidamente dalgunos de los datos más alarmantes “A los asturianos tienen que falallos les cifres, les trentamil families ensin recursos, el 27% de probitú infantil, los 15.000 emigraos añales, les miles d’hectárees  de llabranza abandonaes, el 49% de los paraos ensin prestaciones, el 48% de la flota pesquera desaniciada, los 27.000 mineros menos d’Hunosa, los picos de hasta 3.000% de contaminación perriba lo permitío pola OMS”

Tamién comparó a los presentes coles brases del fueu qu’allumó a Asturies “agora mesmo abultamos pocu, pero que nun se confíen, que  comu soplen muncho prenderemos llaparada y tornaremos a ser incendiu” y desgranó los motivos que tendríen de facer a los asturianos poner en duda’l so sofitu al actual sistema, confiando en que’l Pueblu Asturianu torne a esconsoñar y garrar les riendes del so futuru como tal “Pero una cosa si vos digo, cuando por fin sientan tou esto, cuando esconsoñen y quieran puxar por una Asturies llibre y soberana onde’l drechu a decidir y a ser nos seya innegable… cuando espabilen, equí me tendrán, equí nos tendrán, a Andecha Astur, preparaos pa garrar el relevu y tornar a declaranos dueños del nuesu destín.”

Darréu, entá delantre la tumba orniada con ramos de lloréu y una bandera d’Asturies y cola presencia de dalgún de los descendientes de Belarmino Tomás, los presentes entonaron l’himnu “La Flor del Agua”, col que se preslló l’actu.

This work is licensed under a Creative Commons Attribution 4.0 International License.