El sindicatu d’enseñantes anuncia qu’esta selmana la Conseyería d’Educación va aplicar un retayu más, al nun sacar la convocatoria correspondiente

Con un mes trescurríu dende l’empiezu de cursu son numberosos los centros educativos qu’entá escarecen del personal necesario, tantu profesoráu como personal non docente. Sicasí, en llugar d’acelerar la incorporación de los profesionales necesarios, la Conseyería d’Educación tomó la decisión unillateral de nun realizar la convocatoria de profesoráu interín correspondiente esta selmana, retrasando entá más les incorporaciones, que nun se llevarán a cabu hasta finales d’ochobre El

sindicatu denuncia qu’esto vien sumase a tolos despropósitos que fueron perxudicando a tola comunidá escolar dende  entamos de cursu “Siguimos con una práctica na que s’entemez la ineficacia, el  retrasu na segunda convocatoria, la ufierta de medies xornaes en centros alloñaos que resulten económicamente inasumibles pal profesoráu y unos criterios descomanadamente restrictivos na dotación de personal per parte de la Conseyería d’Educación.”

Les consecuencies pa los centros de too esto son desastroses, llevándolos a tomar midíes estraordinaries contraries al óptimu desendolcu del cursu, como reagrupar  al alumnáu, amontar les hores de les guardies, sobrecargar a los docentes del centru y desdexar l’atención a la diversidá.

SUATEA desixe una rectificación d’esti tipu de polítiques, “que nun son más qu’una amuesa de los retayos educativos que prautica esta Conseyería”, y que se dea cobertoria inmediata de les necesidaes de los centros educativos.

Llucía F. Marqués

This work is licensed under a Creative Commons Attribution 4.0 International License.