Mediaos d’ochobre y Asturies arde, pero non de revolucionarios, sinón d’incendios. Un análisis medianamente seriu de los datos fai camentar qu’una mecigaya de desidia, coldicia y falta d’autoestima tienen más culpa que la falta lluvia
Güei nun riscó na mayoría d’Asturies. Una ñube de ceniza cubre’l país, y nun ye una metáfora. Son ya 38 los incendios. El “Principado” reza pa que llueva y apurre una nota “tranquilizadora” pa que la xente nun llame más al 112 y avisa “Na midía lo posible, evite salir a la cai”… sicasí l’avisu nun aporta a la población, trátase más bien de llavase les manes ante posibles casos d’intosicación. Nun hai medios p’amatar los incendios, nun hai medios pa torgalos y nun hai medios pa persiguir a los culpables ¿o nun hai ganes?. Metanes esti desolador riscar naranxa, una noticia entá más apavoriante. Arde Muniellos. La cabera Viesca virxe d’Europa nun cuenta con un sistema afayaizu de prevención ya estinción d’incendios, y arde.
Ya anantes d’esti mes, los datos referíos a los años ente’l 2.000 ya’ l 2.016 apuntaben a que daqué ta mui mal: Un país tan pequeñu como Asturies, tien amburada nestos años más de la metá de la superficie que nesi tiempu ardió en Francia, el país más estensu y viescosu de la Europa ocidental. Colo d’esti añu ye probable que se ingualen cifres.
Vamos echar una güeyada a la superficie media afeutada por incendios forestales nesti periodu, en términos de porcentaxe respeutu a la superficie forestal y comparao con otros países: Francia, 0,07%, España: 0,61%, Galicia: 1,77% y Asturies el 2,06%, superada namás por Portugal, con un entá más apavoriante 4,09%.
Y nun ye’l clima, nun escaezamos que la mayor parte de Francia tien unes condiciones climátiques más propicies pa los incendios forestales que les que tenemos n’Asturies. Sicasí, nun arde. Porque les “pertinaces seques” nun prenden fueos, namás faciliten que s’espardan. Nun se conoz dala triba d’árbol que prenda por combustión espontánea.
Dicía al entamu l’artículu qu’una mecigaya de desidia, coldicia y falta d’autoestima tienen más culpa que la falta lluvia.
Desidia porque nun ye de creyer qu’a estes altures nun tengamos un cuerpu de bomberos colos medios abondos p’amatar con rapidez cualesquier incendiu nun tiempu razonable y porque, sabiendo que la gran mayoría de los incendios forestales n’Asturies son prevocaos, nun se fai por buscar seriamente a los culpables, lo que mos lleva a la segunda causa:
Coldicia, porque los incendios –salvo esceiciones- nun se prevoquen por pirómanos al usu nin por diversión, sinón por xente que ve oportunidaes de negociu perdayuri: venta de maera quemao, urbanizabilidá de los tarrenos, usu ganaeru, monocultivos d’ocalitos…
Falta d’autoestima, porque namás a daquién que nun ame’l so país sedría quién a amburalu y pa querer al país hai que querese a ún mesmu, a los propios raigaños de los que la Viesca forma parte.
Llucía F. Marqués
This work is licensed under a Creative Commons Attribution 4.0 International License.
