Nesti intre, en que’l Reinu d’España ta siendo seriamente puestu en tela de xuiciu por bona parte de la sociedá, el recibimientu a los reyes d’España na entrega de los Premios Principiegos promete ser multitudinariu
Una vegada más el Pueblu Asturianu amuesa la so refuga a la monarquía y a los premios que -a costa de los asturianos-l a representen, nuna convocatoria masiva a la manifestación y posterior concentración cola que quieren tresmitir a los Reis d’España que nun son los sos súbditos
Andecha Astur, Corriente Sindical d’Izquierdes, Marches pola Dignidá, Lluchando Pola Soberanía, les Asamblees de Trabayaores en Llucha, y la Coordinadora d’ONG’s d’Asturies (CODOPA) son dalgunes de les permunches organizaciones que llamen a movilizase esti vienres escontra los Premios Principiegos; arriendes d’ello, alrodiu de 150 entidaes d’estremáu calter firmaron el manifiestu “Los premios de la vergoña”.
“La situación d’alarmante falta de llibertaes individuales y coleutives na que mos alcontramos fai cuasi una obligación llantar cara a la esibición d’españolismu colonialista que tien a la “Princesa d’España” como protagonista”, aseguren n’Andecha.
Dende les Marches pola Dignidá definen esta entrega de premios como “Un eventu que mos da perceguera, porque dende una Fundación caduca y corrupta buscase dar prestixu y llavar la imaxe a otra istitución más caduca y corrupta entá, la monarquía”, valoración cola que coinciden la práutica totalidá de los convocantes.
Pa les Asamblees de Trabayaores en Llucha, ye importante nun escaecer que nel patronatu de la Fundación Princesa tan les grandes fortunes d’España y dalgunos de los más direutos responsables de la crisis económica que llevó a los conflictos llaborales polos qu’ellos lluchen a diario “En munchos casos, los responsables direutos d’estes situaciones van desfilar pola alfombra collorada de la ceremonia d’entrega de los Premios Princesa d’Asturies”
A la tradicional concentración contra’l reináu d’España demientres la entrega los Premios Principiegos, esti añu súmase la protesta “Los premios de la vergoña” cola que se critica la entrega del premiu a la Concordia a la XE , un de los temes que más angüeñes ta llevantando esti añu, “Una XE que ta permitiendo y promoviendo un xenocidiu a les sos puertes”, como se destaca nel manifiestu.
Ello asina, faise un llamamientu al conxuntu del Pueblu Asturianu a participar na manifestación convocada pal prósimu vienres 20 d’ochobre, con salida a les 16’30 de la Plaza l’Ayuntamientu y a la posterior concentración de magar les 17hores na Plaza la Escandalera d’Uviéu.
Redaición InfoAsturies
This work is licensed under a Creative Commons Attribution 4.0 International License.
