El XXIII Certame San Agustín de Cerámica recuerda a la hestórica fábrica asturiana de lloza

La fábrica de lloza San Claudio d’Uviéu, zarrada en 2009, ún de los edificios más emblemáticos del país, non solamente pola so hestoria sinón tamién pol so llegáu, ye la protagonista d’esta nueva edición del Certame San Agustín de Cerámica. Delles pieces procedentes de la yá llexendaria fábrica van tar espuestes nel Centru Municipal d’Arte y Esposiciones d’Avilés hasta’l 14 de payares.

Amás unos 34 artistes que yá participaron nes ediciones anteriores van esponer diverses obres como homenaxe a la fábrica y al so llegáu, inspirándose toos nun mesmu motivu: una xarra y una taza. Anabel Barrio, direutora de la Escuela de Cerámica y comisaria la esposición, esplica que «ye una amuesa mui rica porque cada pieza tien la so téunica y el so mensaxe tapecíu, el que cada autor quería da-y». Ente l’amuesa destaca la creación de la xaponesa Hissae Yanase, que recrea una tetera clásica coles sos bolses de té.

La esposición tamién inclúi un gran mural compuestu por 88 platos rescataos de la fábrica de lloza, sobro los cualos Pablo Hugo Rozada pintó a mano l’antiguu almacén de moldes de San Claudio. «Surdióme la idea nuna visita a la fábrica. El total de los platos representa esi almacén nel que se guardaben los moldes que yá nun s’utilizaben y que yeren d’estamos de sieglu. Una zona que güei ta casi destruyida por completu», señalaba l’autor, que tamién esplicó que «con esti mural quería axuntar toles artes que formen parte de la mio vida, escultura, cerámica y pintura».

This work is licensed under a Creative Commons Attribution 4.0 International License.