La concentración a la escontra de los Premios Principiegos  y de la monarquía española recibió a  los convidaos a los premios pente glayíos de “Fuera” “Fartones” “Independencia, puxa Asturies dixebrá” “República asturiana, socialista y soberana”  y “los borbones a los tiburones”

Los llemes, xiblios y abucheos  repitieronse ensin descansu demientres les tres hores que tuvieron aportando al actu convidaos y fasta que los asistentes al mesmu salieron. Arriendes d’ello, tou el que quiso pudo votar na Plaza la escandalera la so condición de súbditu del estáu español, con un resultáu bien previsible a la escontra. Ye la segunda vegada qu’un referendum asemeyáu se cellebra n’Asturies (el primeru en 8 setiembre) con idénticos resultaos.

Eso sí, los manifestantes viéronse forciaos a glayar bien fuerte pa ser escuchaos, por mor de la descomanada distancia “de seguridá” que los caltenía a media plaza de distancia del camín d’entrada, mientres que la pequeña manifestación “unionista” pro española foi estratéxicamente colocada práuticamente a les puertes del Campuamor ya en primera llinia, amosando nuevamente la “neutralidá” con que se faen les coses.

Nel actu nun faltaron tampoco les reivindicaciones llaborales, cola presencia d’un numberosu ensame de trabayaores de Duro Felguera que denunciaben la presencia pente los convidaos a la entrega de los Premios de dellos de los responsables de la situación económica que se carez anguañu nel país.

A la concentración acudieron tamién delegaciones de Castiella y Galicia, col envís d’amosar la so refuga a la monarquía y a la concesión del premiu a la Concordia a la Xunión Europea.

Redaición InfoAsturies

This work is licensed under a Creative Commons Attribution 4.0 International License.