Depués del “alloñemos a les vaques de los pueblos ganaderos” el “Nun dexemos perros pastores colos rebaños” el “asfaltemos les caleyes” y el “fora animales xabaces de los montes” llega’l “Nun queremos cabres nel monte”

Apocayá los propietarios de delles cabres recibieron la orde de retirales del monte. Foi en Cabrales, onde’l mesmu Conceyu-yos encamentó a retirar  de manera inmediata a tan impropiu ganáu de la redolada de la Ruta’l Cares.

El pidimientu vien d’una notificación recibida pol conceyu de parte de la Xunta de Castiella y Llión, quien consideren que la presencia de cabres pue derivar en situaciones de peligru pa los turistes que percuerren la sienda, polos desprendimientos de piedres producíos poles cabres nel so pasu pela peña.

Nun ye la primer vegada qu’estos animales resulten “cafiantes”, l’añu pasáu la Conseyería de mediu Rural decidió desfacese d’ellos pol bien espeditivu métodu de matales a tiros, sistema que nun convenció al conceyu cabraliegu, por consideralo estéticamente poco afayaizo y que da “mala imaxe” énte los visitantes.

Una naturaleza onde ca vegada más animales estorben y un turismu verdi nel que se trata d’evitar cualquier molestia provocada pola flora y la fauna xúnense a la falta d’interés por defender los intereses de los ganaeros y de la economía tradicional de la zona–recordemos que’l quesu de cabrales sedría cuando menos complicáu de facer ensin cabres- pa dar llugar a midíes tan esconcertantes como les mentaes.

Llucía F: Marqués

This work is licensed under a Creative Commons Attribution 4.0 International License.