Les numberoses protestes de calter llaicu y feminista nun evitaron el cambiu xurídicu

El presidente de la República de Turquía sigue desaniciando la obra llaica del kemalismu con un nuevu ya importante pasu. El matrimoniu civil dexó de ser l’únicu válidu a efectos llegales en Turquía al ser equiparáu a les bodes realizaes polos clérigos islámicos. Colectivos feministes, de la esquierda, o namás llaicos manifestaron el so malcontentu, considerando que ye una midida más pa avanzar na reislamización de la sociedá y del estáu, pero nun pudieron torgar la nueva norma.

Esta midida forma parte d’un paquete de 42 artículos aprobaos nel parllamentu por iniciativa del islámicu Partíu Xusticia y Desendolcu (AKP) del presidente Erdogan, qu’inclúin la concesión de múltiples competencies a los muftís, llíderes musulmanes venceyaos a la Dirección d’Asuntos Relixosos del gobiernu.

Pa la oposición democrática esta llei nun respuende a nenguna necesidá real de la ciudadanía, sinón que tien como únicus oxetivu l’otorgar más poder social y políticu a los mutfís, que van poder rexistrar non yá bodes con menores d’edá sinón tamién nacencies ensin necesidá de pasar pola alministración civil de la República.

This work is licensed under a Creative Commons Attribution 4.0 International License.