Los  profesores asturianos van poder recibir formación p’atender correchamente nes sos aules a los escolinos con Altes Capacidaes

N’ Asturies hai diagnosticaos alredor de 700 escolinos con altes capacidaes, anque naide dulda de qu’esta ye una condición infradiagnosticada, polo que los menores que podríen desendolcar talentos esceicionales si recibieren l’atención afayadiza ye abondo mayor.

L’actual sistema educativu nun tien o tien una bien escasa rempuesta a les necesidaes d’esti coleutivu, tando llegalmente contemplaes dos midíes a aplicar una vegada deteutáu l’alumnu: adautación curricular y aceleración.

L’aceleración -o adelantu de cursu- permite al escolín pasar una temporada estudiando “al so ritmu”, ello ye, deprender rápido p’algamar a los sos nuevos compañeros. Pasáu esti apurón, les coses siguen igual qu’antes. L’adautación curricular nun acostuma a aplicase, siendo lo avezao que, como muncho, se y dea al rapacín “trabayu estra” pa realizar  una vegada termináu’l “normal”, una midía  contraproducente que-yos fai decidir nun demostrar la so capacidá, porque ¿quién quier trabayar más ensin recibir res a cambéu?.  El fracasu escolar, la desmotivación ya inclusive la depresión menacien a estos prometedores neños nel ámbitu escolar, que son tachaos en munchos casos de “disruptivos” o “faltos d’atención”

Una de les mayores dificultaes a les que s’enfrenten a diariu les families ye’l total desconocimientu per parte de los docentes de les peculiaridaes de los sos fíos, cayendo con frecuencia n’estereotipos meyor o peor intencionaos que los lleven a remanar la situación de manera ineficiente dafechu. Poro, convóquense estos cursos sobro Respuesta Educativa al Alumnáu con Altes Capacidaes, actividá formativa empobinada a tol  profesoráu n’activu cola que pretende rompese con esta ignorancia y promover la formación n’altes  capacidaes intelectuales, ufiertando orientaciones que contribuyan a dar a estos escolinos una rempuesta educativa afayadiza.

Los cursos van impartise n’once sedes distintes, tratando d’algamar al profesoráu de toa Asturies y el plazu pa inscribise nos mesmos ta yá abiertu.

Llucía F.Marqués

This work is licensed under a Creative Commons Attribution 4.0 International License.