Pol so llabor social calteniendo abiertos los chigres-tienda de los sos pueblos

Más de cien muyeres de los pueblos de Tinéu allegaron a les instalaciones Cafento y a la Quesería Tierra de Tinéu onde pudieron conocer la realidá interna d’eses dos empreses del conceyu. Más tarde una xinta de fraternidá nel Palaciu Merás finó con un merecíu homenaxe. D’esta manera l’Ayuntamientu de Tinéu quería homenaxear a cinco muyeres que caltuvieron abiertos los chigres-tienda nos pueblos d’El Baradal, Mirallo, Luciernas, Puentecastro y Bárcena del Monesteriu.

L’alcalde, José Ramón Feito, destacó’l llabor social y económico d’estos clásicos establecimientos, «esos llugares onde ye posible atopar daqué más que comestibles, tamién zapatielles y hasta madreñes». Pero tamién manifestó que «na actualidá, sí que ye ciertu que persisten estos chigres-tienda nel conceyu, pero con dificultá», pos tan amenaciaos pol despoblamientu rural asina como pola competencia de supermercaos y grandes superficies. «Sería bien positivu poder realizar una tributación estremada nestes zones y pa esti tipu de negocios», insistió a la fin del so discursu.

María Fernández, vecina del pueblu d’El Baradal, cuntaba que «ye la primer vegada que me premien y tengo 90 años».

This work is licensed under a Creative Commons Attribution 4.0 International License.