La Xunta pola Defensa de la Llingua Asturiana convoca la so treintadosava edición de  los Premios Andrés Solar, abriendo a tola xente interesao la posibilidá de proponer candidatures a los mesmos

Estos premios, creaos n’alcordanza al famosu escritor nacionaliegu triestimente fináu na so mocedá, compónense de dos categoríes opuestes que resalten, respeutivamente, la llabor a favor y a la escontra de la llingua asturiana.

El premiu “Pegollu” entrégase en reconocimientu a les persones, entidaes, grupos o coleutivos qu’a traviés del so llabor den puxu a la llingua asturiana y la so normalización.

Como contrapuntu al premiu Pegollu ta’l “Madreñazu purpurina“, que distingue a entidaes, grupos, políticos o coleutivos que pongan el so enfotu en despreciar a la llingua y  n’atacar los drechos llingüísticos de los asturfalantes.

L’añu pasáu estos premios foron a parar a Sidra l’Allume ya’l profesor Miguel  Alarcos respeutivamente.

Les candidatures a los premios Andrés Solar tienen d’ unviase correchamente argumentaes a la direición de correos de la Xunta Pola Defensa la Llingua,   info@exunta.org,  anantes del 24 de payares pa ser valoraes pol  xuráu.

L’actu d’entrega de los premios sedrá’l 16 d’avientu en Xixón.

Llucía F. Marqués

This work is licensed under a Creative Commons Attribution 4.0 International License.