El Gobiernu llocal del Partíu Popular torga asitiar una placa en memoria de los presos políticos que construyeron la presa y la canal del Alberche

Na provincia manchega de Toledo, nel corazón mesetario del Reinu d’España, l’ayuntamientu de la llocalidá de Talavera de la Reina ye noticia. El so alcalde, Jaime Ramos, del Partíu Popular, nun autorizó una placa n’alcordanza de los republicanos cautivos que fueron obligaos pola dictadura fascista a construyir la presa y la canal del ríu Alberche. L’argumentu utilizáu pol alcalde ye la presencia na placa de la bandera tricolor de la II República Española.

Una placa que se diba asitiar na avenida de la Real Fábrica de Sedes, señalando asina esti enclave como un “llugar de memoria” n’alcordanza de los presos y les sos families, “que tamién sufrieron injustamente la represión”, como recoyía una moción aprobada pol Plenu municipal en septiembre de 2015, col refugu del PP pero col sofitu de dos exediles de Ciudadanos, güei integraos nel so Gobiernu.

El Gobiernu en base a una interpretación especialmente peculiar de la moción agora suxure la instalación de la placa “na redoma de la presa”, fora del términu municipal de Talavera de la Reina, para dempués reafitar la so “voluntá” de cumplir namás lo aprobáu pol Plenu.

This work is licensed under a Creative Commons Attribution 4.0 International License.