David Castañón – www.lesfartures.com – @lesfartures
La realidá asturiana da pa estudiu sociolóxicu, somos un pueblu p’analizar.
Resulta qu’esti añu tenemos muncha mazana asturiana, la “cosechona” nomenla. Y resulta que los llagares asturianos tan dexando mazana asturiana ensin mercar porque compren siempres un porcentaxe de mazana de fora. Y delles asociaciones y prensa agorera asturiana entamen a falar d’etiquetar nes botelles de sidra l’orixe de la mazana de la sidra que tamos bebiendo.
¡¡Pero si fai 16 años qu’esiste la Denominación d’Orixe “Sidra de Asturias”!!
Tenemos una marca de calidá que certifica que la sidra que tamos bebiendo ye de mazana 100% asturiana, con un etiquetáu propiu y en casi toles sidreríes d’Asturies. Ye 50cts más cara, sí, pero tamién tien un certificáu de calidá, ta controlada por un organismu públicu independiente y amás, garantiza 100% que ye un productu asturianu.
Pues la xente nun la bebe. Crez so consumu tolos años, pero sigue siendo un 5% de tola sidra que bebemos n’Asturies. ¿Queréis que nun se tire mazana asturiana? Pues bebéi sidra 100% asturiana. Ye per fácil.
Ya tenemos palos de sidra, ya podemos escoyer qué sidra beber, agora amás podemos decidir si tomamos sidra 100% asturiana o sidra que pue ser asturiana o non. Si echamos esi gabitu, el llagar va apostar más pola mazana asturiana, vamos favorecer que merque más d’equí y menos de Galicia, Francia o Polonia, vamos favorecer qu’un paisanu plante pomares en cuenta ocalitos y vamos conseguir por fin qu’Asturies tenga una economía rentable alredor la sidra, como asocede n’otros países.
Ye cenciellu, ¿queréis sidra asturiana? Bebéi Sidra Denominación d’Orixe. Lo demás, ye falucar.
This work is licensed under a Creative Commons Attribution 4.0 International License.
