La población asturiana ta a favor de la oficialidá de la so llingua. Izquierda Xunía quier la Oficialidá. Podemos desixe la oficialidá como única vía pal asturiano. El PSOE defínese a favor de la Oficialidá. Obviamente los partíos que siempres llucharon pola oficialidá, como Andecha Astur, quieren la oficialidá. ¿¿Por qu’entós l’asturianu nun ye oficial??
Nos caberos tiempos los titulares de prensa sosprienden pola aparente unanimidá no que cinca a la oficialidá del asturianu, tanto que munchos asturianos ya sienten el tan naguáu llogru na pica los deos… dende que nel caberu congresu de la FSA s’esconsoñaren esperances col posicionamientu favoratible del tradicionalmente reticente PSOE, les declaraciones sucédense por parte d’estremaos partíos.
“La oficialidá del asturianu ye l’únicu métodu d’asegurar la so pervivencia” asegura Concha Masa, diputada asturiana d’IX, mientres el Secretariu xeneral de Podemos n’Asturies, Daniel Ripa, declaraba «Que l’asturianu nun seya oficial ye una anomalía dientro la Costitución». El Conseyeru d’Educación, Genaro Alonso, defende la oficialidá de la llingua asturiana, apuntando que “la cooficialidá ye’l modelu que más convién a una llingua”… una riestra de declaraciones que lleva a la mesma academia de la LLingua Asturiana a declarar que “Enxamás tuvimos tan cerca d’algamar la oficialidá de la llingua asturiana “
El Catedráticu de Ciencies Polítiques na Universidá del País Vascu y direutor del Euskobarómetro, Francisco Llera Ramo, afirma que la mayoría del elleutoráu de los partíos políticos asturianos d’estremaes ideoloxíes, incluyíu’l PP, apuesten pola oficialidá de la llingua asturiana. Los resultaos de la cabera encuesta sociollingüística son determinantes: Namás un escasu 18% de la población que vive n’Asturies de más de 16 años sedría contraria a la Oficialidá, el 91% de los asturianos defende la so escolarización… Y si toos estos datos foren pocos, la ridícula imaxe de 6 presones manifestándose tres d’una “masiva convocatoria escontra la oficialidá” fala por si sola.
Sicasí, a un díi del aconceyamientu de la Comisión d’estudiu sobr’l réxime de proteición y promoción del asturianu de la Xunta Xeneral, el PSOE recula y conxela la oficialidá del asturianu a traviés d’un twit d’Adrián Barbón, venceyándola a un camudu na costitución y desautorizando al conseyeru de cultura al descartar esplicitamente la oficialidá nesta llexislatura.
Per otru lláu, nos conceyos asturianos onde hai mayoría de los partíos “favorables” nun s’apreben Ordenances Municipales d’Oficialidá qu’afeutaríen a más del 75% de la población asturiano.
Por tou ello, Lola Suárez, Responsable de Llingua d’Andecha Astur, declaraba que “da la impresión de qu’hai más ganes de salir na semeya que de dar pasos efeutivos pola oficialidá”, retando a los representantes de los partíos que se declaren favoratibles a dar pasos concretos darréu. Amás, recalcó que la oficialidá nun ye en si un destín, sinón un perimportante pasu nel camín de dignificación de la llingua nacional “La Oficialidá llega, pero hai que curiar que llegue en condiciones y que nun se retrase más nin acabe marafundiándose too con una “oficialidá de mínimos”, una “oficialidá en fases”, galleguizando l’ocidente asturianu, o allargándose la so aprebación fasta l’infinitu”.
Llucía F. Marqués
This work is licensed under a Creative Commons Attribution 4.0 International License.
