Va pa mediu añu que se tan produciendo los esbarrumbes na mina al cielu abiertu de Zarréu, en Degaña, una esplotación de más de 250 hectárees

Los esbarrumbamientos son consecuencia de los trabayos d’esplotación de la mina y suponen un altu riesgu, non solo pal entornu, sinón pa les persones y animales que transiten pela fastera, ya que la mina nun ta arrodiada con una malla cinexética pa torgar el pasu, como ye preceutivo.

La superficie afeutada ta  avanzando escontra’l fayéu del Monasteriu d’Hermo nel  conceyu de Cangas del Narcea, que forma parte del parque Natural de Fontes de Narcea, siendo una de les más importantes zones d’osos y gallos monteses del país.

Tanto la Coordinadora Ecoloxista como los vecinos del pueblu ya presentaron denuncies (ante la Conseyería d’emplegu Industria y turismu y la Guardia civil, respeutivamente) pero fasta agora nun hai constancia de midíes preventives pa torgar la repetición de los esbarrumbes.

Tou esto coincide col diseñu en marcha por parte del pueblu d’un plan d’ordenación y aprofitamientu caltenible del monte que podía vese mui negativamente afeutáu por estos esbarrumbes.

Redaición InfoAsturies

This work is licensed under a Creative Commons Attribution 4.0 International License.