La falta de rempuesta por parte del gobiernu tres de les quemes forestales anima a los vecinos de Cangas de Narcea a garrar l’aniciativa y llantar ellos mesmos una viesca
Los 30 abidules y una zrezal llantaos tuvieron un valir tanto simbólicu como ecolóxicu, ya que con ellos non solo s’aniciaba una Viesca, sinón que con ellos los vecinos quixeron sensibilizar y concienciar so la importancia del curiáu de los montes, depués de les llacerioses quemes qu’arrasaren va pocu’l surocidente d’Asturies.
Víctor García, vecín de Tablao, vecín de Trabao, desplicó la escoyeta d’abidules pa llantar: son un árbol mui significativu pa toles zones que se quema, ya que ye biolóxicamente pioneru, preparando’l suelu pa les otres especies. Tamién resaltó la importancia de la rempuesta del pueblu asturianu ante estes llaceries “somos xente que siente’l territoriu”, afitó, contrastando coles autoridaes que se desentienden del “paraísu que mos quemaron”, ya que, como Enrique García (otru vecín) fizo notar, l’alcalde , José María Álvarez Rosón, nin siquiera acudió al actu. Otru de los asistentes recalcó la importancia d’esta triba d’aniciatives, que “dexen nidio que’l futuru d’Asturies pasa pola implicación direuta del Pueblu Asturianu na solución de los sos problemes, ya que toos conocemos los resultaos de sentase a esperar que los d’arriba faigan algo”.
Los convocantes -l’ Asociación La Escuelina Rural, El Rincón Cunqueiro, Quei Vitorino y el GDR Altu Narcea- nun cuntaben cola bona rempuesta de la iniciativa ya’l bon númberu de persones que s’averaron al Altu’l Campillu pa revindicar una política forestal que contemple más midíes de prevención coles que torgar que se repita’l desastre.
Ye importante recordar qu’esta triba de llantaos nun se deben facer ensin control, ya que per un llau ye perimportante que les especies seyan autóctones y pel otru la tierra recién quemao pué nun tar en condiciones y písalo pué facer muncho mal al suelu, aidando a la erosión.
Llucía F.Marqués
This work is licensed under a Creative Commons Attribution 4.0 International License.
