David Castañón – www.lesfartures.com – @lesfartures

La Naveta ta asitiada nel centru Nava, capital mundial de la Sidra con permisu la Villa, y nun viende sidra natural. Lo que podría paecer una especie de sacrilexu, tien la so esplicación cuando conoces un pocu la hestoria d‘Ana y Ricardo, dueños del local.

Miembros fundadores de La Buena Cofradía de los Siceratores, confradería destinada a saoleyar la sidra asturiano en toles sos variantes, comprobaron va unos años el vacíu de mercáu qu‘esiste n‘Asturies de tercios de sidra, y punxéronse en contautu col mayor espertu llagarero pa llevalo a cabu (yá qu‘ellos nun cunten con llagar propiu): Fran Ordoñez, dueñu del Llagar Viuda de Angelón – Pomar.

Tres delles prebes, empezaron a distribuyir La Naveta Brut, cola que collecharon un pergrande ésitu que remató col Primer Premiu nel XXXIX Festival de la Sidra de Nava na estaya de Tercios de Sidra. Ye una sidra brut de 6,3º buenísima y refrescante, con una segunda fermentadura natural en depósitu

Muncha parte de la normalización qu‘empieza a suponer atopase con sidra asturiano de botellín en cualquier cafetería d‘Asturies y non solamente en locales especializaos, ye gracies a ellos. Lo cual ye bien d‘agradecer.

Amás, anguaño llanzaron La Naveta Roxa, sidra rosao de 5º con una segunda fermentadura natural en depósitu, qu‘algama’l so peculiar color coloráu por cuenta la maceración coles magayes de la mazana. Otra maravía, muncho más llambiona que l‘anterior.

Pero la Naveta, amás, ye muncho más que sidra, ye ún de los meyores locales onde puedes tomar un Vermú. Tienen de munches clases. Tou un paraísu pa los vermuteros. Amás, ellaboren el so propiu vermú, Amestao o vermú de sidra, qu‘amás hai que tomalo dempués d‘un golpe secu na barra.

Si ta bonu, has de tomar daqué na terraza. Pero nun podéis dexar pasar a visitar l‘interior. Afayadizu, llenu de rellavicos y pequeños detalles, con una decoración que te va prestar.

Les tapes son de llata o embutíos. Asina que pide un pocu de chorizu de Rozaes (Bimenes), un pocu de Quesu La Collada (Cirieñu – Amieva), qu‘amás dexen curar 2 meses más nel so local pa que tenga un puntu (puntazu) estra, un pocu xamón, unes sardines … con una Naveta Brut o Roxa y … ¡a esfrutar!

This work is licensed under a Creative Commons Attribution 4.0 International License.