Contaminación ambiental, Llingua asturiana, intervención de la OLAF nel fraude de los fondos mineros y apurrir el so sofitu a los perxudicaos d’AZSA foron les principales cuestiones trabayaes nel Parllamentu Européu
Andecha Astur ta representada nel Parllamentu a traviés del eurodiputáu Josu Juaristi, de Los Pueblos Deciden-coalición cola que se presentó a les elleiciones- y a traviés d’elli apurrirá la so firma oficial en reclamación de los drechos mélicos qu’agora mesmo tan ñegándose a los 49 trabayaores afeutaos pol escape de mercuriu nes istalaciones d’Asturiana de Zinc.
Tamién per esa vía presentarán nos prósimos díes una entruga acerca’l futuru de la llingua asturiana y la inmediata necesidá d’oficialidá.
Especialmente satisfechos amuésense col aconceyamientu calteníu colos comisionaos europeos de mediu ambiente Roel Hoenders (Oficial de polítiques de Calidá del aire y emisiones industriales) y Michael Klinkenmberg (Oficial de proyeutu científicu / téunicu), quienes garraron bona nota de los datos apurrios so la contaminación del aire n’Asturies nos caberos años. 
Nel trescursu del conceyu anunciaron la puesta en marcha d’un procedimientu contra l’estáu español por infracciones de les normatives europees relatives a la calidá del aire, pero informaron también de la llentitú d’esti procedimientu, que puede entardar dica 6 años anantes d’aportar a una solución cierta, polo qu’encamentaron l’aniciu d’actuaciones a nivel nacional darréu.
No que cinca a la intervención de la Organización Europea de Llucha contra’l Fraude (OLAF) nel casu del marafundiu de los Fondos Mineros, Andecha Astur ya ta trabayando nos puntos concretos a presentar acordies la recomendación del equipu européu, que reconocieron la procedencia de presentar estos fechos ante l’organismu de control de los fondos europeos.
Amás, nestos díes caltuvieron dellos aconceyamientos coles delegaciones canaria (UPC) y aragonesa (Puyalón) de Los Pueblos Deciden.
Redaición InfoAsturies
This work is licensed under a Creative Commons Attribution 4.0 International License.
