Pablo Rodríguez Medina, Lluis Aique Iglesias Fernández y Llucía Fernández Marqués son los tres premiaos de la ventiava edición d’esti prestixosu concursu lliterariu
Esti sábadu 2 d’avientu, de magar les 12’30 hores cellebraráse nel Muséu Casa de les Radios, en Suares (Bimenes) l’actu d’entrega de los premios y la llectura de“Los restos d’un naufraxu”, el cuentu ganador, na voz del so autor, Pablo Rodríguez Medina(L’Entregu, 1978). Los otros dos premiaos son Lluis Aique Iglesias Fernández (Sotrondio, 1967) cola obra “Polly a les puertes del paraísu”, y Llucía Fernández Marqués (Xixón, 1974) col cuentu “Ca tolos vientos”.
Darréu actuará’l monologuista Carlos Alba, col so personaxe Cellero representando “La llei del cuchu”. Carlos Alba ta acabante de ganar l’I Premiu Nel Amaro de Teatru Profesional n’Asturianu, convocáu pola Conseyería d’Educación y Cultura del Principáu d’Asturies.
Nesta edición el xuráu tuvo compuestu polos escritores Xulio Vixil Castañón, Ana Esther Martínez Sierra y Francisco Álvarez González, amás de pol Alcalde Bimenes, Aitor García Corte, y el técnicu responsable de la Estaya de Cultura, Daniel Cueli Canto, que ficieren les funciones de Presidente y Secretariu respeutivamente. Ye de destacar l’enfotu del conceyu Bimenes en caltener esti certame lliterariu y l’esfuerzu qu’ello-y supón, yá qu’esta edición, como nes de los caberos años, nun cuenta con dengún sofitu económicu esternu.
Redaición InfoAsturies
This work is licensed under a Creative Commons Attribution 4.0 International License.
