La Conseyería informó apocayá a los vecinos de que “siguen pendientes d’un estudiu ambiental” anque esti estudiu yá se llevó a cabu va años

Los habitantes de la llocalidá cabraliega de Sotres, la población asturiana a más altor (1.050 m), lleven años solicitando la istalación de viseres antiargayos de ñeve que protexan les sos carreteres, recibiendo a cambiu promeses y plazos que se allarguen más ca vegada. Esti añu tornó aportar la ñeve primero que la proteición, anque la ñevada que cayó nun ye, enagora, un peligru pa los conductores.

La primer ñeve de la temporada cubrió con una espesura d’alredor de cinco centímetros, lo que punxo en marcha per primer vegada esta seronda les máquines quitañeves pa llimpiar la carretera de Poncebos a Sotres. Sicasí, saben qu’esti ye namás l’entamu, ya que tolos años carecen la falta de medios pa enfrentar les condiciones metereolóxiques. Pa munchos, la negación de los recursos y servicios necesarios a les fasteres rurales ye otra vía de favorecer el despoblamientu d’estos núcleos.

Na Conseyería afirmen que siguen esperando pola realización d’un estudiu ambiental, yá que anque yá se fixera unu, este “ye un  nuevu proyeutu”, lo que al paecer fai necesariu repitir l’estudiu. Los vecinos tarrecen qu’hasta que nun se produza un accidente seriu nun seyan tomaes en cuenta les sos reclamaciones.

Redaición InfoAsturies

This work is licensed under a Creative Commons Attribution 4.0 International License.