El conceyu de Bimenes lliquidó en dos años y mediu la delda d’alredor de 200.000 € que’l conceyu caltenía cola mancomunidá Comarca  la Sidra d’exercicios anteriores

La mayoría de la delda provenía de los servicios que’l consistoriu yerbatu tien acomuñaos y que permanecíen pindios de pagu dende’l mandatu del anterior gobiernu, a manos d’un grupu indepediente bien cercanu al PSOE.

La situación  que tenía’l Conceyu de Bimenes, a la fin de l’anterior llexislatura, tocantes a delda pindia yera caótica. Taben pendientes de pagu 39.234,59  € del añu 2013, otros 93.502.57 € del añu 2014, amás de los gastos realizaos de Xineru a Mayu de 2015 , ensin lliquidar, sumando un total de 167.590,28 €, a los qu’habría qu’añedir la resultancia d’ese mesmu añu 2015, colo qu’a 31 d’avientu, la cifra a pagar xubiría a 221.610,15.  Amás de la delda a Mancosi, el nuevu gobiernu tuvo de faer frente a factures de provisores impagaes y encarar la sentencia xudicial pola que se condergaba a Bimenes al pagu de la piscina municipal, que nunca llegó a terminase y que xube a mediu millón d’euros.

El pasáu 1 d’avientu diéronse por pagos tolos exercicios anteriores, de manera que Bimenes entra nuna nueva etapa “ensin llastres económicos” ensin que pa ello fore preciso amontar los impuestos y tases municipales –que nel 2.018 van permanecer conxelaes per tercer añu consecutivu- nin medrare la nómina del alcalde y ensin necesidá tampoco d’amenorgar los servicios a los ciudadanos nin prescindir de trabayadores.

Dende’l nuevu gobiernu local de Bimenes destaquen que pa ellos yera primordial quitar de delda y la estabilización económica del conceyu, poniendo al díi les aportaciones a la Mancomunidá de la Comarca de la Sidra, garantizando asina una bona prestación de los servicios acomuñaos, qu’inclúin árees como Desendolcu llocal, oficina téunica, serviciu d’archivos y servicios sociales.

Redaición InfoAsturies

This work is licensed under a Creative Commons Attribution 4.0 International License.