Con esti galardón reconoz el llabor y acciones d’empreses, istituciones y alministraciones que destacaron más nel so llabor contra la naturaleza ya’l mediu ambiente del país
Esta ye la 25 edición de la Moñica de Purpurina, que la CEA otorga añalmente a aquel ente que más dañu fixere al mediu natural asturianu. Prevése qu’esti añu tea bien reñíu.
El xuráu va decidir la próxima selmana cuál de los candidatos presentaos ye’l más sobresaliente. Anque’l premiu nun ye denguna chancia, entregaráse’l 28 d’Avientu.
Los seis candidatos que superaron la primer escoyeta son: el Ministru de Fomentu, Íñigo de la Serna por ayudar a siguir acabando coles cercaníes ferroviaries, Black Dragon Gold (antigua AsturGold) por querer resucitar el proyeutu de la contaminante mina d’oru de Salave, Hunosa por siguir emperrada en sacar alantre’l fracking y les mines a cielu abiertu, HC-EDP Enerxía poles sos emisiones contaminantes nes sos térmiques, el nuevu Conseyeru d’Ordenación del Territoriu’l señor Fernando Lastra, quien refugó aconceyase colos grupos ecoloxistes mientres sigue alantre con una política nefasta y a lo cabero, pero non menos importante, Arcelor pol altu nivel de contaminación que produz.
L’añu pasáu la distinción recayó nos Grupos Parlamentarios de la Xunta Xeneral por dexar ensin efeutos les acotadures de la zones quemaes, nun país onde les quemes forestales constitúin un grave problema.
Llucía F. Marqués
This work is licensed under a Creative Commons Attribution 4.0 International License.
