L’analís de la situación y de les midíes a adoutar realizáu polos espertos el día Mundial de les Montañes son direutamente aplicables al territoriu asturianu, una de les zones europees nes que ye mayor l’impactu del amenorgamientu y l’avieyamientu poblacional. Datos recientes destaquen que comu media un trabayador rural percibe n’Asturies la metá qu’un trabayador industrial
El cambéu climáticu, el desdexamientu de les instituciones, la masificación turística, la degradación de les tierres, la escasez de servicios, la sobresplotación y los desastres naturales constitúin, ente otros, fenómenos que menacien unos recursos esenciales pal planeta, yá que más de la metá de la población mundial depende de les zones de monte p’abastecese d’agua, alimentos y enerxía llimpio. Envalórase qu’en redol al 39% de los habitantes de montañes nos países en desendolcu (329 millones de persones) ye vulnerable a la inseguridá alimentaria, al aisllamientu y a la probitú.
Esta situación de riesgu fomenta que l’abandonu aumente de forma esponencial, xenerando un círculu viciosu nel que la despoblación xenera amenorgamientu de medios y servicios y la falta d’estos deriva nun espoxigue de la emigración, menguando tamién la preservación de la diversidá cultural y agrobiológica.
Fáense imprescindibles mayores inversiones y polítiques empobinaes a solliviar les dures condiciones de vida de les comunidaes de montaña, xestionando correchamente los riesgos al traviés de la prevención, valorando les conocencies tradicionales de los sos moraores y respetando la so forma de vida perriba d’otros porgüeyos, permitiendo la participación activa de los pueblos implicaos na toma de decisiones, priorizando la rehabilitación de los servicios públicos como la escolarización y l’atención sanitaria ya implementando infraestructures de tresporte y comunicaciones. L’adoción de midíes específiques pa l’adaptación al cambéu climáticu resulta igualmente urxente.
Tamién se proponen los pagos por servicios ambientales, contribuyendo d’esta forma a ameyorar les condiciones económiques de les comunidaes de zones montascoses y la promoción de productos y servicios d’alta calidá, facilitando l’accesu a los mercaos internacionales.
Llucía F. Marqués
This work is licensed under a Creative Commons Attribution 4.0 International License.
