La Federación de Parroquies Rurales yá cunta col modelu d’ordenanza que-yos dexaría recaldar en xunto ente siete y nueve millones d’euros añales; tamién aspiren a tasar el pasu de gasoductos y llínees telefóniques

La propuesta de cobrar una tasa a la compañíes lléutriques y de gas polos tendíos y gasoductos que percuerren Asturies, ensin necesidá de que suministren enerxía a los vecinos, entamó a garrar  forma en Corvera a primeros d’añu, sumándose depués L.lena y Morcín, anque con munches zancadielles llegales de les empreses lléutriques, que traten d’evitar el pagu. Col entamu  l’añu prevese qu’un total de 25 parroquies  entamen a cobrar esta tasa pol usu del dominiu públicu -el suelu, el sosuelu y el sobresuelu- per parte d’estes empreses.

La idega que subyaz nesta tasa ye que los espacios públicos son un bien común y el so usu per parte d’empreses privaes tien de revertir nun beneficiu pa la comunidá, polo que les instalaciones lléutriques tendrán d’abonar una cuota, igual que lo faen terraces o puestos de vienta ambulante.

L’occidente asturianu va ser el mayor beneficiariu d’estos nuevos ingresos, yá que  daqué más de la metá de les parroquies esistentes, 39, van tasar a les lléutriques. Esti gravame sobro l’usu del dominiu públicu de les empreses enerxétiques podría ser  una solución pa los problemes de financiamientu de les parroquies rurales.

Llucía F. Marqués

This work is licensed under a Creative Commons Attribution 4.0 International License.