Nueve modalidaes esportives, tres d’elles na categoría de deporte adautáu, recibieron les ayudes al esporte avilesín
Fundación Deporte Avilés (Fundavi) de la que formen parte’l ADBA, el Belenos, l’Atlética, La Curtidora y la Cosa Nuesa, partió un total de 5.250 euros ente los esportistes avilesinos qu’algamaron podios importantes o participaron n’Europeos y Mundiales mientres el 2016.
Los biatletes avilesinos, que s’alzaron con dellos campeonatos d’España, Europa y el Mundu, llograron un total de seis becaos; otros ocho fueron los medallistas de llucha Sambo, ente los que destaquen Cristina Miragaya y María López Coloma, qu’amás tuvieron nel Européu y fixéronse con un séptimu y un tercer puestu, respectivamente, el piragüista David Fernández Marqués, novenu puestu nel Européu absolutu C2 1000 metros, amás de podios nacionales, Hyo Seuk Seo, bronce nel Campeonatu d’España senior por clus de taekwondo modalidá Freestyle, son dalgunos de los premiaos. Natación adautáu, yudu, tiru olímpicu adautáu, Laser run y triatlón, son el restu de modalidaes esportives premiaes
Estes ayudes, coles que FUNDAVI «valora, reconoz y premia al enorme esfuerzu que realicen munchos esportistes avilesinos o pertenecientes a clus d’Avilés en competiciones d’ámbitu nacional ya internacional» entamaron a dase hai 11 años, cola idega de dar puxu a los esportistes individuales. D’entos p’acá, partiéronse un total de 92.002,50 euros en 293 beques.
Redaición InfoAsturies
This work is licensed under a Creative Commons Attribution 4.0 International License.
