L’abandonu de les fasteres rurales algama a les empreses llactees asturianes, que sumen dos décades de cayía nel númberu d’esplotaciones

El llácteu ye un de los seutores de mayor relevancia y protagonismu pal cooperativismu agrariu y medio rural asturianu. Dolce de les cooperatives agru-alimentaries asturianes, desendolquen la so actividá dientro d’esti seutor, tanto de forma direuta como indireuta; otres munches tán venceyaes con esti sector, pola comercialización de productos rellacionaos cola alimentación animal y los servicios ganaeros. La desapaición de noventa esplotaciones lláctees, un 4,6% del total, en solo un añu y dientro d’una dinámica involutiva que se caltien nes dos caberes décades ye sintomática de la situación en que s’atopa la ganadería asturiana.

Les cifres evidencien el fracasu del alcuerdu pa la estabilidá y caltenibilidá d’esti seutor, un compromisu multiseutorial qu’en teoría contemplaba reivindicaciones hestóriques, como la necesidá d’identificar l’orixe de los productos llácteos, el cese del usu de la llechi como productu reclamu basáu nel baxu preciu, o l’aplicación de contratos, precios y volumes de compra en concordanza cola evolución del mercáu.

Sicasí, la conseyera de Desendolcu Rural y Recursos Naturales, María Jesús Álvarez, calificó de “razonablemente bonu” l’añu 2017 no que cinca al seutor llácteu, anque alcuentra llixeramente “esmoleceor” la perda d’esplotaciones de llechi. Nel so analís de la situación nun venceya’l zarru d’esplotaciones a la cayida y avieyamientu de la población rural, nin ve la relación ente la falta de relevu xeneracional col abandonu y  la falta de servicios nos pueblos. El desdexamientu de les árees rurales xunío a la baxa rentabilidá del trabayu ganaeru, l’escasu marxe de negociación de condiciones y precios -bien per debaxo de la media europea-, creando un escenariu bien poco afayaizu pa la incorporación de nuevos ganaeros..

El fechu ye que tamos asistiendo al esmantelamientu del sector primariu, que tendría de ser poles característiques orográfiques y sociales del país el de mayor pesu n’Asturies, ensin que s’ufierte a cambéu una alternativa vidable.

Llucía F. Marqués

This work is licensed under a Creative Commons Attribution 4.0 International License.