David Castañón – www.lesfartures.com – @lesfartures

El Gobiernu del Principáu entamó la Campaña de Navidá de la marca de calidá asturiana “Alimentos del Paraíso” col eslogan “Viaje a los Sabores de Asturias”.

Nel Palaciu Conde de Toreno axuntaron ellaboradores, políticos, téunicos y medios pa, ente toos, puxar pol productu asturiano. En cuasi toles intervenciones, la mesma xustificación “queremos reivindicar el productu de nueso ensin nacionalismos nin ofienses a naide”.

Esa mesma xustificación amuesa’l complexu asturianu que llevamos dientro. Defender lo nueso, pero cola puntina, nun vaigamos ofender a daquién por valorar el productu asturianu per encima los demás.

Somos un país envidiáu en too’l mundiu. Lo tenemos too: paisaxe, cultura, productu, gastronomía. El país de los quesos -dicen-, pero atopes antes un manchegu qu’un quesu asturianu; el país del agua pero nun atopes agua asturiana en nengún restorán; el país de la sidra que nun consume sidra fecha con mazana asturiana; el país de les fabes con faba suramericana; el país de la carne de txogitxu mientres la Casina gana concursos a la meyor carne del mundiu; el país del vinu que diz qu’el so vinu ye malu mientres gana concursos internacionales …

Consumamos asturiano, amás de por ser nueso, por ser n’algunos casos el meyor, de los meyores productos del mundiu. Y esti Nadal, que ye de los meses que más consumimos, más aínda. Mercando pa les fartures familiares, esixendo nos restoranes onde comamos, pidiendo nes consumiciones que bebamos, regalando nes nueses visites cestes de Nadal.

Con arguyu, y que s’ofienda quien s’ofienda. ¿O dalguién vino a pedinos permisu cuando defenden los sos productos?

Y señora conseyera de Desendolcu Rural y Recursos Naturales, ye “afuega’l pitu”, con u. ¿Qué vos dicía del complexu?

This work is licensed under a Creative Commons Attribution 4.0 International License.