Escenines permite a los rapacinos asturfalantes sentir la so llingua nun alrodiu prestosu y nun ambiente venceyáu a les navidaes y la folixa, daqué de descomanada importancia pa la so formación llingüística, metanes el bombardéu d’estimulos españolfalantes ya mesmu anglófalantes que los arrodien

Un añu más Reciella, Families pol Asturianu, entama “Escenines”en Xixón, el Festival d’Artes Escéniques pa neñes y pa neños en llingua asturiana

Dientro de la programación navidiega xixonesa la reciella podrá esfrutar de cuatro prestoses actuaciones pensaes especialmente pa ellos, dientro del Festival Escenines. El Cientru Cultura Antigúu Istitutu ya’l Colexu Xovellanos sedrán les sedes qu’acoyerán les obres de teatro y el conciertu musical que lu componen.

El miércoles 27 dará entamu Escenines, cola representación, de magar les  18.30 hores, de la obra  “Contábenmelo en casa”, con Carlos Alba Cellero y Martín Peña Alba, nel Antigúu Istitutu. El Xueves 28, a la mesma hora y llugar, Kamante Teatro representarán “¿De qué color ye’l sol?” ya’l vienres pondráse n’escena la tercer y cabera obra, “La neña de les trences al revés”, que  sedrá interpretada pol grupu “El Callejón Del Gatu”.

El Festival presllará cola presentación del tercer discu “Bestiariu” que recueye obres d’estremaos grupos y cantantes asturianos pa la reciella.

This work is licensed under a Creative Commons Attribution 4.0 International License.