Cientos de neños y neñes acudieron al Acuariu de Xixón a recibir a L’Anguleru y apurri-y les sos cartes en man

Nervios, ilusión y autógrafos, la reciella recibió na tardi d’ayeri a L’Anguleru, recién llegáu de la Mar de los Sargazos y preparáu ya pal so llabor de repartu na Nuechibona.

Seique va pocos años que l’Anguleru reparte per toa Asturies (antiguamente llendábase a la fastera costiega de San Xuan de l’Arena) los sos siguiores nun faen sinón medrar dende que decidió ampliar el so territoriu de trabayu. La llabor de los llendaores, collaboraores del Anguleru n’estremaos puntos de la xeografía asturiana, ye fundamental pal ésitu d’esta expansión, que l’añu pasáu fizo aportar regalos incluso al país vecín.

En declaraciones feches ayeri a la prensa l’Anguleru aseguró que lo tien ya too preparao y tranquilizó a la xente pola polémica de la baxada de preciu de l’angula que tinía esmolecio a muncha xente “Ta too preparao y nadie que fore bonu va quedar ensín regalu, tendréis toos lo que pidisteis y dalguna sospresina” aseguró.

Dende la so llegada a Asturies el pasáu 18 d’Avientu, la so axenda foi enforma apretada, ya que fizo un percorríu per abondos colexos, cuidando que denguna carta quedare pel camín. Guei tará n’Avilés de magar les 12:30, nun cortexu nel que tará acompangáu por Lolina la Rulera y los Llendadorinos del Tambor. Los presentes podrán ver en direutu l’encantexu del serazu que lu prepara pa la maxa de Nuechibona; repartiránse castañes de chicolate.

El domingu, anantes del repartu, desfilará nel so tradicional cortexu, saliendo a les seies y media del puertu pesqueru de L’Arena. La organización encamienta vistise con ropa d’agües o chubasqueru mariellu, verdi o azul y traer una llinterna o farol p’allumar a L’Anguleru nel so camín escontra La Rula.

Llucía F. Marqués

This work is licensed under a Creative Commons Attribution 4.0 International License.