L’españolismu más descontroláu ta garrando posiciones nuna Asturies que nun sabe buscar el so llugar na situación d’anguañu

Sentase a tomar daqué nun chigre y tener que sentir que te insulten por quien yes, por como yes, por como fales. Por nun ser español. Por nun querer ser español. Por ser catalán. Por ser asturianu.

Nel casu más recién, una moza foi agredía nun chigre xixonés –El Candil- por pidir respetu a quienes insultaben a la so xente; nun tien xacíu poner en dubia la so versión cuando toos sentimos perdayuri conversaciones asemeyaes. Otru ponía, va pocu, un cartel torgando la entrada a independentistes, supónse que de tou país, pero con clara intención anticatalana. En cualisquier parque, chigre o colexu cualquiera siéntese con drechu a correxir a los mios fios por falar asturiano. Llanten una bandera española de 12 metros (al más puru estilu hitlerianu) nel cientru Xixón. A un conceyal de Castrillón torgase-y espresase na nuesa llingua. Nun son cuestiones estremaes: son les oreyes del llobu, tenemoslu en casa.

L’españolismu siéntese fuerte y con drechu a atacar, llexitimizaos pola prensa, sofitaos pola policía, respaldaos por una opinión pública mediatizada y pocu dimpuesta a analizar los fechos y sacar les sos propies conclusiones. Almitir les agresiones mirando pa otru lláu faemos a toos cómplices. Dar fuercia a un movimientu, el nacionalismu español, tan reconocidamente violentu, ponmos a toos en pelligru de carecer una d’estes agresiones.

Llucía F. Marqués

This work is licensed under a Creative Commons Attribution 4.0 International License.