Los sindicatos ya lo avisaren: “la Sanidá Pública resentiráse estes navidaes pola falta de sustituciones”. Les asociaciones d’enfermos ya lo avisaren “les emisiones contaminantes van multiplicar los ingresos”. Sicasí, les urxencies colapsen, les consultes allárguense nel tiempu, les cites y operaciones retrásense tanto que d’avezu aporten sero. Munchos pacientes desvíense a l’atención privada. ¿Falta de previsión o plan escontra la sanidá Pública?
Estos díes el nueu Hospital Universitariu Cientral d’Asturies alcuéntrase saturáu, con pacientes perriba de la so capacidá. La gripe, les infeciones respiratories y la falta de mélicos n’atención primaria enllenen les sos istalaciones con un record hestóricu. Nun ye l’únicu, la mayoría de los hospitales asturianos furrulen perriba les sos capacidaes.
Seique dende Sanidá quiten importancia a la falta d’asistencia y retruquen que “contratarán refuerzos pa enfrentar la epidemia de gripe… en cuantes que seya posible” pa los sindicatos mélicos «La falta de personal ye perimportante, nun hai celadores, enfermeres nin mélicos pa dar a bastu con esto. Ye una falta de previsión brutal».
La situación vese agravada pola ruina capacidá asistencial y la falta de personal y materiales de los centros de salú d’Atención Primaria “La enfermera salió al so propiu coche a por materiales qu’ella mesma mercaba pa faceme la primer cura” relata A.E.M, un de los pacientes atendios ayeri n’urxencies. Les demores d’atención nes cites n’atención primaria , de fasta mediu mes, emburrien a los enfermos a urxencies, onde s’alcuentren con un escenariu asemeyáu y esperes de delles hores anantes de ser atendios. Bon númberu d’ellos finen por derivar a la sanidá privada, onde son atendios con rapidez ya eficiencia, polo que munchos ven nesto una estratexa de privatización a mediu plazu de la sanidá pública.
El Sindicatu Mélicu Asturianu (Simpa) alvierten de que la situación empeorará nos años vinientes «Ya avisamos que la situación va empeorar porque en cuatro años van xubilase mil mélicos y n’ Asturies, a díi de güei, namás hai 3.000».
Redaición InfoAsturies
This work is licensed under a Creative Commons Attribution 4.0 International License.
