El plan d’aides pa la resturación d’horros llanzáu el pasáu mes d’agostu pola alministración asturiana deniega la prautica totalidá de les solicitudes

La redaición de la convocatoria, anunciada como “una importante midía de l’alministración pa prevenir el desaniciu del padrimoniu arquitectónicu asturianu” ya yera de por si restrictiva, llendándose a aquelles costruciones que tuvieren reconocíes como Bien d’interés Cultural o formaren parte del Inventariu del Padrimoniu  Cultural d’Asturies, lo que prevocó que namás cinco horros optaren a esta subvención: los de Ponga, Bimenes, Cabranes, Les Requeres y dos de Cabranes.

Sicasí, namai que se concedió a un horru beyuscu, por un valor de 5.625 euros. El beyuscu ye una variedá d’horru de los más  primitivos, llocalizáu nos alrodios del desfilaeru los Beyos, con teyáu a dos agues ya ensin corredor, de los que queden perpocos exemplares, la mayoría en ruines.

Los propietarios d’horros  non solo nun perciben los sofitos necesarios pa caltenelos en bones condiciones, sinon que los que queren remocicalos tienen de facer frente a importantes gastos y desixencies llegales que traben el so curiáu, amás del coste de la reparación propiamente dicha, careciendo amás restricciones d’usu, lo que da llugar al esmolecedor abandonu en que se ven munchos, que si bien nun son valtaos son desdexaos fasta el so desaniciu.

Como ye vezu, el “Principado” pospón la resolución d’esti problema, que pon en pelligru la pervivencia de la edificación más emblemática del país, anunciando que  “ A lo llargo del 2018” tienen previsto llanzar “una nueva llínia de subvenciones”, pero ensin concretar feches, condiciones nin la so dotación económica.

Llucía F. Marqués

This work is licensed under a Creative Commons Attribution 4.0 International License.