De xemes en cuandu, sobro too cuando nun aconceyo cola mio xente de vezu, salen alderiques políticos y cuandu yos digo que yo soi nacionaliegu asturianu, delles vegaes faenme entrugues abegoses de retrucar… pero non dafechu imposibles de facelo

Fernán Morán. Presidente de la Lliga Celta d’Asturies

La mayoría xente tien un conceutu pertracamundiau de lo que ye nacionalismu, bona parti culpa tienenla les consecuencies d’una llucha armao de un pequenu seutor de la población d’otres naciones –y nun m’estráña porque ficiéronse abondes aberraciones y asesinatos que nunca debieron facese dientru d’una democracia-; aiciones polítiques ensín l’aval social ya internacional necesariu nun mal momentu, etc, etc, etc.

Yo entiéndolo, emperu criminalizar el nacionalismu ye comu xulgar pel mesmu raseru a 1500 millones de musulmanes polo que fae una pequeña facción d’ellos al traviés del DAESH; decir que tolos rumanos son lladrones o prosenetes en función de lo que suel venir p’Asturies ensín tener conocencia de la rialidá’l pueblu rumanu; o milenta exemplos más que podría poner d’estremaos seutores y ámbitos peru sedría mui llargu y cafiante tantu datu.

Baste dicir que les xeneralizaciones nunca suelen ser bones nin xustes, y si amás criminalicen… pior. Cuandu hai daquién que m’entruga que porqué soi nacionaliegu, que pa qué si nun vamos amalgar siguier representación parlamentaria –estu nel meyor los casos, cuandu nun me califiquen de panterrorista por selo, comu si ser nacionaliegu implicara ser favoratible al exerciciu la violencia p’amalgar oxetivos o esparder ideoloxíes-; n’esa tasitura ye perabegoso tresmitir a una persona que nun tien la mesma sensibilidá que tú, que ye por amor, por amor sinceru y puru a la tierra que te vio ñacer, al pueblu del que formes parti, a la cultura que te dio una identidá… Cómo-y pues facer entender a una persona qu’ames ca brizna práu pel que pises cuandu vas paseando pel país; qu’adores los afálagos que te fae’l vientu alrodiu’l to cuerpu y que ca vegada qu’inspires l’aire d’Asturies –y digo d’Asturies porque güel diferente, nun hai más que pasar el Negrón pa dase cuenta- noto comu m’enfresca per dientru; la sensación d’abellugu que da’l techu ñubes ya l’orpín; cómo desplicar esa allegría que siente ún cuandu siente’l son d’una gaita melguera; l’almiración de ver les edificaciones d’Arte Astu-rianu, los teitos, los castros, les quintanes, los palacios y castiellos…; la sensación llariega del tastu y golor del chigre; la satisfaición de sentir la to xente falando’n nueses llingües llariegues; el compromisu fonderu que siento cuando voi pel país y veo la xente rural nes sos xeres o falando sentaos na plaza; o’l que m’inváde n’Uviéu güeyando la mocedá nos institutos y les universidaes de facer lo posible pa qu’haiga futuru n’Asturies pa toos/es ya’l tremendu atristayamientu ya impotencia que m’inváde viendo que nun ye posible y que la mayoría d’esa mocedá dexará’l so llar, la so xente, porque nun pue vivir nel so llugar…

Cómo facer entender que ca vegada que viaxes pel país o paseés pela cai la to ciudá y ves más y más comercios pesllaos, empreses pesllaes y xente deses-perao xélatese l’alma y duelte fonderu nel to coral… como facer entender que ver comu los pueblos y les quintanes van quedando abandonaes ya n’elles namái queda la soledá y atristayamientu d’un pueblu pantasma… Como desplica-y a la xente que yes nacionaliegu porque ca vegada que lleés un periódicu o ves un telediariu ya entéreste de noticies males pal to país en cualesquier sector (pesca, ganadería, industria, demografía, emplegu, sanidá, servicios sociales, etc) sientes comu si tclavárente un puñal de xelu’n mediu’l pechu… Comu fala-y a naide de comu adores les montañes, los rigos, los llagos, les praderíes, el mar bravu que baña les nueses costes y toles formes de vida que tan n’ellos y que cuando tas n’ellos siénteste llibre y parte integrante de too esu… y que ca vegada que llees que hai persones qu’amburien nueses biesques sagraes, contaminen nuesos rigos o mares… duelte tantu y tan fondero que nun ties ganes nin de xintar o reir… Cómo-y pues describir a daquién nun tien la mesma sensibilidá que tú que cuandu ún fala d’Asturies nun ta falando dalgu ayenu a ún mesmu, que cuandu falo d’Asturies, toi falando de mí, porque yo soi Asturies y configuro Asturies al mesmu tiempu… Como desplicar que yes demócrata enantes que munches coses y qu’enxamás pondríes al to pueblu ente l’espada y la muria; qu’ames la to xente anque nun piense comu tú; que l’únicu que quies ye qu’Asturies espoxigue pa que la xente nun marche ya puéa quedase nel so llar cola posibilidá rial d’un proyeutu de vida… Comu desplicar tantes emociones y sensaciones que guíen la to vida’n forma valores personales y compromisu cola tierra que te dio la vida… Ye abegoso… Quiciabes imposible.

Lo que si pueo dicir, ensín equivócame, ye que ser nacionaliegu ye amor, amor incondicional pola to patria, pola to xente, pola to identidá… amor por ser quién yes y a lo que pertenceces y eso ye estremao dafechu de la visión violenta ya inclusu terrorista d’algunes persones pa con nos. Querer la reconocencia d’Asturies comu la nación que ye, qu’haiga políticos/es que sientan por Asturies, nuesa cultura ya identidá, ya’l pueblu asturianu el mesmu amor que siento yo, o asemeyáu al menos, y que trabayen en consecuencia nun ye malo… tolo contrario, ye bono, ye tan bono qu’estorba, peru namái estorba a la xente que nun quier entender, y pa entender, lo meyor ye escuchar, escuchar activamente y comprender el mensaxe. Ye difícil y abegoso comu dixi nun principiu describir sentimientos y sensaciones, emperu hai daqué que sí quiero dexar mui nidiu, lo que me mueve a ser nacionaliegu ye una sola cosa: amor

This work is licensed under a Creative Commons Attribution 4.0 International License.