Cuando una batalla ta cuasi ganada l’enemigu siempres ataca con renovaes fuercies. Nun hai que dexase llevar pola medrana, nun ye un pelligru, ye’l so caberu aliendu

Llucía F. Marqués

Asistimos ablayaos al ataque unánime y sincronizáu de prensa y redes contra l’asturianu. El díe que nun surde un grupu “anti”, sal  una tiesta bienpensante esbabayando o una noticia fuera llugar cola que meter miéu a la población. El síndrome “Cataluña”, que s’engafa con tolo que nun seya español y mui español, fae por espardese y por esparder un esmolecimientu artificial que nun tan nes cais, como amosaron de sobra les caberes encuestes.

Tranquilos, ye namás que tienen miéu. La posibilidá de que se de un descomanáu pasu alantre nos drechos llingüísticos asturianos cola Oficialidá ta ehí, pendiente namás d’un vraeru enfotu que torne en fechos les promeses y que camude los xeitos en realidaes. Si quienes dicen querer la oficialidá la quieren, ye cierto, esti añu podríemos algamala.

Y eses son coses que nun presten pizca a la España que n’Asturies carecemos, nin a la nueva nin a la vieya. Nun quieren sentir de los pasos alantre, nin de los drechos, nin de les llingües, muncho menos de lo asturiano.

Poro, nun ye d’estrañar qu’enseñen el dentame, como animales acorralaos. Nun cometamos l’error de dayos cancha y muncho menos el d’asustanos.

This work is licensed under a Creative Commons Attribution 4.0 International License.