La PAH anuncia que piensen denunciar énte’l Defensor del Pueblu y del Menor los procesos de desallugu que s’evitaríen en casu de tramitase correchamente les ayudes
La falta de dilixencia de l’Alministración, y en concretu del “Principado” y del Conceyu de Xixón na tramitación d’ayudes y viviendes d’emerxencia, qu’anantes se tramitaben en menos d’un mes y tarden agora ente cuatro y seis meses en ser concedíes, lleven a les families a atropar importantes retrasos, que non siempres se solucionen cuando llega la subvención, una y bones esta nun ye retroactiva.
Agora mesmo hai na ciudá más de diez desahucios pindios por impagu d’arriendu nos que la ineficiencia cola que se tán xestionando les ayudes tienen enforma que ver.
Amás, una vegada producíu’l desallugu, según denuncien dende la PAH, tampoco furrula correchamente’l sistema d’axudicación de les viviendes d’emerxencia social, daqué que trai una vulneración del decretu d’axudicación que regula la so entrega. La resultancia ye l’espoxigue de families que, tres el desfiuciu, viven camudando de cutio de llar, en coches o viviendes ensin les condiciones necesaries.
Denuncien asinamesmo’l tratu dau a les families na Oficina de la Vivienda en Xixón, onde se torga l’acompangamientu d’asesores a los usuarios, que dicen ser trataos como culpables de la so situación.
Coles mesmes, el “Principado” caltien un númberu importante de viviendes públiques pindies de ser iguaes y tramitaes en Xixón, qu’en marzu del 2017 xubíen a un total de de 117, de les qu’ente agostu y xineru entregáronse trés namás, tando’l restu vacies y/o pindies d’igua.
Redaición InfoAsturies
This work is licensed under a Creative Commons Attribution 4.0 International License.
