Una dellegación d’Andecha Astur llevó’l pasáu mes de Payares énte la Comisión Europea de Calidá del Aire el problema de les emisiones contaminantes

Les estaciones midiores de polución de les fasteres de Xixón, Uviéu, les Cuenques, Sieru, Carreño  y la Comarca d’Avilés recoyeron niveles desorbitaos demientres el pasáu añu, sobropasándose de continuo les llendes marcaes pola llexislación europea y produciéndose dellos “acidentes” o escapes masivos de fumos dende dalgunes de les empreses más contaminantes, pente elles la  térmica de Aboño, la cementera de Tudela Veguín, Galvazinc y ArcelorMittal. Sicasí, fasta la presentación de la información pola delegación d’Andecha Astur, la Comisión Europea de Calidá del Aire trabayaba colos datos oficiales ufiertaos pol “Principado”, que facíen referencia a la situación de los años 2014/2015.

Recientemente la Comisión vien d’anunciar que s’investigará la contaminación ambiental de nueve países qu’incumplen significativamente la llexisllación europea al respeutu, tando Asturies pente ellos. En concretu, piden  desplicaciones pola contaminación ambiental na fastera central d’Asturies, en xeneral, y más concretamente en Xixón, onde los niveles de  diósidu de Carbonu, de NO2, de benceno y de les partícules contaminantes, (PM10), sobrepasaron la llende en numberoses ocasiones ensin que les autoridaes tomaren les correspondientes midies.

Nuria Prendes

This work is licensed under a Creative Commons Attribution 4.0 International License.