Na Encuesta de Demanda ellaborada por Divertia remanez que, en 2017, visitaron la ciudá un total de 1.585.673 viaxeros, lo que supón un +3,4% más que l’añu pasáu y afita un récor nuevu hestóricu pa la ciudá. Esto significa que 2017 foi’l meyor añu turísticu de la hestoria de la ciudá

La cifra total de viaxeros agospiaos n’establecimientos hoteleros de Xixón en 2017 algama les 419.500 persones; poro, son 17.744 más que l’añu anterior y medra un +4,4%, afitando un máximu hestóricu nuevu.

Esta tasa de crecimientu (+4,4%) supera la rexistrada pa la media de les 7 ciudades principales de la España Verde (+3,5%) y ye Xixón la segunda ciudá que más medra, namás superada por Santander. Xixón afítase asina como’l motor turísticu de la rexón.

El xorrecimientu caltiénse tanto pal turismu nacional (+3,6%) como pal foriatu (+10,1%). La cifra acumulada nesta estaya de mercáu algama los 57.271 viaxeros y ye la más alta rexistrada fasta la fecha na ciudá dende que se dispón de datos oficiales.

No que cinca al númberu de pernuechaciones hoteleres la cifra acumulada algama los 824.781; poro, aseméyase a la rexistrada en 2016 (meyor datu hestórico) y baxa sele (-0,7%). Ye un resultáu perbonu nun añu nel que medraron les pernuechaciones en pisos turísticos.

No que cinca a la rentabilidá, l’ingresu mediu por habitación ocupada (ADR) afítase en 66,83 euros de media en 2017 (un +7,0% más que l’añu caberu) ya’l RevPAR ye de 36,91 euros por habitación disponible y medra un +1,7% respeuto al añu caberu.

La fauturación del seutor hoteleru en conceutu d’agospiu en 2017 asciende a 34,1 millones d’euros; poro, medra un +3,9% respeutu al añu caberu.

La cifra d’escursionistes algama les 497.279 persones, lo que supón un incrementu del +0,2 respeuto al añu pasáu, y la de turistes agospiaos na ciudá los 1.088.394 restantes, con un medru del +5,4% respeutu a 2016.

El 38,5% de los turistes agospiáronse n’establecimientos hoteleros (419.500 persones), lo que supón un incrementu del +4,4% respeutu al añu caberu.

N’establecimientos estrahoteleros agospiáronse 42.371 viaxeros (+4,5%), en pisos d’alquiler 24.393 viaxeros (+5,5%) y en viviendes privaes en propiedá o d’amigos o familiares 602.130 persones, un +5,2% más que l’añu caberu.

No que cinca al númberu de pernuechaciones totales, algámase la cifra récor de 5.260.833, lo que ye un medru del +5,5% respeutu al añu pasáu y supera pela primer vegada na hestoria de la ciudá la cifra de los 5 millones de pernuechaciones.

El repartu d’esta cifra total de pernuechaciones ye 824.781 n’hoteles -segundu meyor datu hestóricu per detrás de 2016-, 138.987 n’establecimientos estrahoteleros, 88.973 en pisos d’alquiler y 4.208.125 en viviendes privaes propies o d’amigos o familiares.

Redaición InfoAsturies

This work is licensed under a Creative Commons Attribution 4.0 International License.