Esti xueves día 25 a les 19:30H el téunicu ambientalista Ignancio Martinez va dar una charra nel Centru Social Autoxestionáu La Semiente, de L’Entregu, sobro la problemática del Plumeru la Pampa y otres plantes invasores
Considérase invasores a les especies animales y vexetales alóctones –ello ye, procedentes d’otros llugares del planeta- qu’ocupen y estrocen l’habitat de les del llugar, dañándoles de manera irreversible. Destaquen pola so gran capacidá d’adautación y la facilidá cola que puen atopar un mediu afayaizu pa subsistir, tornándose nuna menacia pa les especies autóctones coles qu’entren en competencia, llevándoles munches vegaes a la estinción.
Non toles especies esótiques puen considerase invasores pero de la Herba la Pampa o Plumeru puede afirmase la so capacidá d’afayase, vivir, competir y reproducise naturalmente n’otru llugar estremáu a l de so, produciendo nesti procesu un efectu negativu sobro’l mediu y sobro les especies llocales, como podemos ver per toa Asturies. La presencia d’esta planta nel país medró de forma alarmante na cabera década.
Esti xueves en La Semiente falaráse sobro les sos consecuencies y sobro les estremaes midíes a tomar pa la so erradicación o como mínimo pa frenar el so espoxigue.
Nuria Prendes
This work is licensed under a Creative Commons Attribution 4.0 International License.
