Esta fin de selmana, el Ministru-Voceru sosprendió a los sindicatos d’ensiantes col novedosu escurrimientu d’enllantar un sistema MIR nel ámbitu educativu

En términos xenerales, trataríase d’un llargu procesu nel que les persones qu’aspiren a exercer la docencia tendríen que realizar los estudios universitarios correspondientes, un máster de capacitación docente y, de siguío, un nuevu modelu de formación pedagóxica que tendría que ser evaluáu positivamente antes de poder presentase a la tradicional oposición.

Dende SUATEA, ven con sorpresa esta propuesta, máxime si  se tien en cuenta que mientres los meses anteriores desendolcárase la negociación del sistema d’ingresu a la función pública docente ente Ministeriu y organizaciones sindicales y nun hubo mención dalguna a esta proposición.

Dende medios oficiales, preséntase la iniciativa como una propuesta que va incidir na calidá educativa. Pa SUATEA, l’alderique ye un pasu más pa siguir precarizando l’actividá docente. Con esti sistema, los qu’aspiren a exercer la docencia cumpliríen una función asemeyada a la de cualesquier docente, pero con menos drechos y retribuciones económiques amenorgaes.

Pal sindicatu d’enseñantes, escarez de sentíu cualquier comparanza ente les necesidaes del seutor mélicu ya’l seutor educativu. Tamos solamente ante una estratexa llaboral que pretende amontar los años de preparación del personal docente en condiciones de mayor precariedá. “Si realmente quieren falar de calidáeducativa, la midida directo y contundente que tendríen qu’aplicar sería la derogación del Decretu de racionalización del gastu públicu de 2012,  que solo sirvió pa empiorar gravemente la calidá del sistema educativu”.

Nuria Prendes

This work is licensed under a Creative Commons Attribution 4.0 International License.