La escritora asturiana María Luz Pontón va tar presente na Feria Internacional del Llibru de la Habana cola so novela xuvenil “La Misteriosa Desapaición”

El xueves, 8 Febreru de 2018, nel marcu de la 27º edición de la Feria Internacional del Llibru de la Habana, la escritora asturiana, María Luz Pontón, va presentar la so novela xuvenil “La Misteriosa Desapaición”, editada por La Fábrica de Llibros.

Nel actu, amás de l’autora, va intervenir l’artista cubana, Iranidis Fundora, illustradora de la cubierta.

La obra trata d’una adolescente que s’atopa atrapada y esposada nel interior d’un fedorosu y llúgubre veículu ye incapaz de remembrar la so identidá ya’l so pasáu, yá que la so mente protexela d’un sucesu traumáticu. Tópase apavorada porque ta a mercé d’un malváu carceleru, Llaveru, alies el Diañu.

El contautu con otros mozos y con unos enigmáticos personaxes va ser determinante pa que pueda recuperar la memoria y afayar quién ye y lo que ta asocediendo. Tamién la ayuda a superar el mieu que-y torga lluchar contra la tarrecible ya inxusta realidá.

María Luz Pontón ye Doctora en Pedagoxía y la so carrera profesional tuvo siempres amestada a la enseñanza. Na so llarga ventena d’obres publicaes, l’autora cultivó diversos xéneros en castellán y asturianu, siendo tornada a al catalán dalguna de les sos obres. Tamién dirixió y presentó dellos programes na televisión y la radio asturiana.

Nuria Prendes

This work is licensed under a Creative Commons Attribution 4.0 International License.