El recursu presentáu pola Plataforma contra la Llínia d’Alta Tensión “Aniellu Costa Verde” plantegaba que la inclusión del aniellu central na planificación aprobada pol Ministeriu d’Enerxía fraya la normativa del sector llétricu, al incorporar una serie de proyeutos de fuerte impactu ambiental ensin xustificar la so necesidá
La Plataforma amuesa la so total disconformidá cola sentencia del Tribunal Supremu onde torna la so solicitú d’anular el proyeutu del aniellu d’alta tensión nel so tramu oriental, incluyíu nel caberu intre na Planificación Llétrica 2015-2020.
A xuiciu d’esta Plataforma, el proyeutu nun respuende a necesidaes reales y tien implicaciones ambientales, urbanístiques, sociales ya inclusive sobro la salú de los vecinos que de nenguna manera son valoraes nel momentu d’ellaborar los proyeutos.
El Ministeriu d’Enerxía y REE solicitaben la inadmisión del recursu defendiendo que les asociaciones vecinales nun tán llexitimaes pa cuestionar en vía xudicial l’adecuación de la planificación del sector llétricu y que los vecinos nun tán capacitaos pa recurrir un proyeutu que los afeuta de forma direuta, polo qu’estos consideren que se ta frayando’l so derechu de participación ciudadana nos asuntos públicos, una y bones la llei si contempla esta posibilidá
El TS na so sentencia valora qu’estos proyeutos tán incluyíos nel Informe de Caltenibilidá Ambiental (ISA) aprobáu, al cuntar con un total de dos frases dientro de les más de 700 páxines de les que consta dichu documentu.
Pa faer valir los derechos de los vecinos, la plataforma evalúa presentar un recursu d’amparu énte’l Tribunal Constitucional onde s’espondría l’ausencia tanto d’una valoración real de l’afeición ambiental como d’una xustificación de la necesidá del proyectu pal conxuntu del sistema llétricu, pero’l costu económicu d’esti recursu d’amparu enllurdia la posibilidá de presentalu, negándose-yos una tutela xudicial efeutiva.
Dende la Plataforma declararon que “Esti fallu fai que se pierdan los principios que promueven y garanticen la tresparencia de l’actuación de l’Alministración, perpetuando un modelu opacu ya ineficiente de planificación lléutrica que fomenta la costrución de nueves infracadarmes de tresporte ensin nengún tipu de xustificación”.
Dende esta Plataforma demanden un nuevu modelu enerxéticu, centráu nelaforru y l’eficiencia enerxética que dexe afaer el consumu eléctricu a les necesidaes reales, buscando la producción próxima a los llugares de consumu, menguando asina la estensión de les llínies llétriques, y centráu nes necesidaes reales de les persones, convirtiendo a la población nel focu principalde les decisiones en llugar de los intereses privaos y especulativos d’empreses y mercaos financieros.
La Plataforma contra la Llínia d’alta Tensión “Aniellu Costa Verde” ta compuesta pola Plataforma Bimenes contra l’alta tensión, les AAVV de Collao, Valdornón, El Peñón de Pano, Serín, Ceis, Ruedes, Vega La Camocha y El Remediu , l’Asociación de vecinos afeutaos pola torre de tensión del Altu la Maera, l’Asociación Cueto Belloso, El Centru Social La Semiente, la Coordinadora Ecoloxista d’Asturies, l’Asociación Asturiana d’Amigos de la Naturaleza y la Confederación d’Asociaciones de Vecinos d’Asturies.
Llucía F. Marqués
This work is licensed under a Creative Commons Attribution 4.0 International License.
